Merkinga skal gi forbrukarane høve til …

… å få valuta for pengane sine

God merking gjer det lettare å samanlikne pris og kvalitet. Forbrukaren kan samanlikne vekta på ulike produkt. I ingredienslista skal det stå kva for ingrediensar produktet inneheld. I dei fleste tilfella skal det gå fram av emballasjen kor mykje av ein karaktergivande ingrediens eller kategori av ingrediensar, for eksempel kjøtt, som er brukt.

… å unngå ting ein ikkje toler

Ingredienslista skal gi nødvendige opplysningar om kva produktet inneheld. Dette er for eksempel viktig for dei som er allergiske eller overfølsame.

…å unngå gammal mat

Dei fleste næringsmiddel skal merkjast med ”Best før + dato” og opplysningar om korleis matvara skal lagrast. Mat som fort blir skjemd, skal merkjast med ”Siste bruksdag”.

... å vite kven du skal kontakte

Alle næringsmiddel skal merkjast med namn og adresse (eller telefonnummer i Noreg) til den som har anten framstilt, pakka eller forhandla vara. I visse tilfelle skal næringsmiddel merkjast med opphavsland.

… å vite korleis maten skal lagast til

Somme næringsmiddel må for eksempel tynnast ut eller krev andre tillagingsopplysningar.

Kvar vender du deg dersom du har spørsmål?

• Dersom du har spørsmål om merking av næringsmiddel, skal du først vende deg til butikken der du kjøpte vara.
• Du kan også ta direkte kontakt med produsenten. Det skal alltid vere ført opp ei adresse (eller eit telefonnummer i Noreg) på emballasjen.
• Dersom du har mistanke om at merkinga er feil eller villeiande, kan du kontakte Mattilsynet på telefon 06040.