Sjekka import-sjømat for uønskte stoff
I 122 stikkprøver av importert sjømat fann havforskarane eit par overskridingar av EU sine grenseverdiar.
Norge er forpliktet til å utføre veterinær grensekontroll av varer som blir importert til EU/EØS-området fra land utenfor dette området. Foto: Helge Skodvin / Havforskningsinstituttet
Undersøkinga er ei årleg overvaking på vegner av Mattilsynet. Havforskarane ser etter utvalde kjemiske stoff, parasittar og bakteriar folk kan bli sjuke av.
– Vi fann Vibrio-bakteriar i to prøver av scampi. Men ved nærmare analyse, viste det seg å vere ein av dei mange harmlause variantane, fortel forskar Martin Wiech.
Fann bakteriar i norsk sild frå Egypt
Forskarane fann også såkalla H2S-produserande bakteriar. Dei er ikkje ein helsefare i seg sjølv, men seier noko om kvaliteten i sjømaten. Dette gjaldt prøver av tunfisk og yellowtail frå Stillehavet og østers frå Canada.
Det er ikkje fastsette grenseverdiar for desse bakteriane.
– Vi gjorde eitt funn av Listeria-bakteriar i norsk sild som var eksportert til Egypt, men sendt tilbake igjen til Norge grunna plassmangel i lokale fryselager, fortel forskaren.
Kveisen var daud
Vidare fann dei rundormen kveis i 9 av 40 undersøkte prøver, mest i torsk frå Russland. Fisken var fryst, og parasittane daude. Frossen eller varmebehandla kveis er ikkje rekna som farleg for folk.
– Kveis er også vanleg i norsk, villfanga fisk, minner Wiech om.
Tre prøver hadde for mykje tungmetall
I 89 prøver såg forskarane etter tungmetall. I høvesvis éin prøve kvar fann dei kadmium, bly og kvikksølv over EU sin grenseverdi.
– Det gjeld ein prøve av hermetisert sardin, av tunfiskfilet og av små krabbar, alle frå Asia, seier Wiech.
– Når det gjeld legemiddel, fann vi ingen restar av ulovlege stoff, avsluttar han.